लाडकी बहीण योजनेचा ऑक्टोबर महिन्याचा हप्ता जमा झाला का? ‘या’ सोप्या पद्धतीने चेक करा.
ऑक्टोबरचा हप्ता वितरण सुरू
‘मुख्यमंत्री लाडकी बहीण’ योजनेच्या महिला लाभार्थींसाठी एक आनंदाची बातमी आहे. महिला व बालविकास मंत्री आदिती तटकरे यांनी दिलेल्या माहितीनुसार, ऑक्टोबर महिन्याचा हप्ता आजपासून खात्यांमध्ये जमा होण्यास सुरुवात झाली आहे. या योजनेंतर्गत पात्र महिलांना दर महिन्याप्रमाणे या वेळीही थेट बँक खात्यात ₹१,५०० रुपये जमा केले जाणार आहेत. सध्या या योजनेच्या लाखो महिला लाभार्थींना ऑक्टोबर महिन्याचा सन्मान निधी वितरित करण्याची प्रक्रिया आजपासून सुरू झाली आहे.
तुमचे पैसे जमा झाले की नाही, असे तपासा!
लाडकी बहीण योजनेचे पैसे थेट लाभार्थींच्या बँक खात्यात जमा होत असल्याने, आपले पैसे जमा झाले आहेत की नाहीत, हे तपासण्यासाठी खालील सोप्या पद्धतींचा वापर करता येईल:
१.नोंदणीकृत मोबाईल मेसेज तपासा: बँक खात्यात पैसे जमा झाल्यावर लाभार्थींच्या नोंदणीकृत मोबाईल क्रमांकावर त्वरित मेसेज (SMS) येतो. हा महत्त्वाचा मेसेज आला आहे की नाही, हे तपासावे.
२.बँक बॅलन्स चेक कॉल सुविधा: अनेक बँका बॅलन्स चेक करण्यासाठी विशिष्ट क्रमांक देतात. त्या क्रमांकावर कॉल केल्यानंतर कॉल कट होऊन लगेच शिल्लक रकमेचा मेसेज येतो. या सुविधेमुळेही पैसे जमा झाले का, याची माहिती त्वरित मिळेल.
३.ऑनलाईन बँकिंग/ॲपचा वापर: ज्या महिला ऑनलाईन बँकिंग सुविधा किंवा बँकेचे अधिकृत ॲप वापरतात, त्या बँक स्टेटमेंट डाऊनलोड करून किंवा ॲपमध्ये तपासणी करून पैसे जमा झाले आहेत की नाही, याची खात्री करू शकतात.
४.कस्टमर केअरला संपर्क: आपल्या संबंधित बँकेच्या कस्टमर केअर क्रमांकावर कॉल करूनही खात्यात जमा झालेल्या रकमेची माहिती मिळवता येते.
५.बँकेला प्रत्यक्ष भेट: जे लाभार्थी ऑनलाईन बँकिंग वापरत नाहीत, त्यांनी आपल्या बँकेच्या शाखेत जाऊन कर्मचाऱ्यांच्या मदतीने लाडकी बहीण योजनेचा हप्ता जमा झाला आहे की नाही, याची खात्री करून घ्यावी.
१८ नोव्हेंबरपूर्वी ई-केवायसी (E-KYC) पूर्ण करण्याचे आवाहन.
मंत्री आदिती तटकरे यांनी सर्व पात्र महिलांना योजनेची ई-केवायसी (E-KYC) प्रक्रिया पूर्ण करण्याचे विशेष आवाहन केले आहे. त्यांनी म्हटले आहे की, “योजनेतील सर्व पात्र लाभार्थ्यांच्या आधार संलग्नित बँक खात्यात सन्मान निधी लवकरच वितरित होणार आहे. महाराष्ट्रातील माता-भगिनींच्या अखंड विश्वासाने सुरू असलेली सक्षमीकरणाची ही क्रांती यशस्वीरित्या मार्गक्रमण करत आहे.” ही वाटचाल अखंडपणे सुरू ठेवण्यासाठी, या संकेतस्थळावर मागील महिन्यापासून ई-केवायसी सुविधा उपलब्ध करून देण्यात आली आहे. सर्व लाडक्या बहिणींनी १८ नोव्हेंबरच्या आधी ही ई-केवायसी प्रक्रिया पूर्ण करावी, असे आवाहन त्यांनी केले आहे.
